Published On: Mon, Feb 22nd, 2016

വിജയത്തിന്റെ കഥയല്ല ; ഇത് ജീവിത സമരത്തിന്റെ ബേബിച്ചായന്‍ ഫോര്മാറ്റ്

Share This
Tags

ജോൺ ബേബി ഊരാളിൽ / അരവിന്ദ് വി

uralil 2

പലായനങ്ങളുടേയും കുടിയേറ്റങ്ങളുടേയും കൂടി ചരിത്രമാണ് കേരളത്തിനുള്ളത്.  ആധുനിക കേരളത്തിന്റെ ചരിത്രം പൂര്‍ത്തിയാകണമെങ്കില്‍ അത് രചിക്കേണ്ടത് വിദേശങ്ങളില്‍ നിന്നു കൂടിയാണ്.  ബേബിച്ചായന്‍ എന്ന ജോൺ ബേബി ഊരാളിൽ അന്യരാജ്യത്ത് നടത്തിയ ജീവിതസമരം കേവലം ഒരു വ്യക്തിയുടെ മാത്രം കഥയല്ല.  കെട്ടിപ്പൊക്കിയ വിജയം ബേബിച്ചായന്റെ മാത്രം ബിസിനസ്സ് വിജയവുമല്ല.  അന്യരാജ്യങ്ങളില്‍ ശരീരത്തിന്റെ ഓരോ അണുവും അറിഞ്ഞു നേടിയ സമ്പത്ത് ഒരു ജനതയുടെ ജീവിതത്തിന് മേല്‍ അറിഞ്ഞും അറിയാതെയും മാറ്റങ്ങള്‍ വരുത്തിയ സാമ്പത്തിക ശാസ്ത്രം കൂടിയാണ് ഓരോ പ്രവാസിയുടേയും ജീവിതം.

ഗഫൂര്‍ക്ക ദോസ്ത് …

വിജയനും ദാസനും അറബിവേഷത്തില്‍ കടല്‍ നീന്തിക്കയറുന്നൊരു ചലച്ചിത്ര ദൃശ്യം മലയാളികളില്‍ വലിയ പൊട്ടിച്ചിരി ഉയര്‍ത്തിയിരുന്നു.  എന്നാല്‍ ഇതേ ദൃശ്യം അത്ര പൊട്ടിച്ചിരി ഇല്ലാതെ വിങ്ങുന്ന ഹൃദയത്തോടെ മാത്രം കണ്ടിരുന്ന ഒരു വലിയ ജനത നമുക്കുണ്ട്.  പ്രവാസം തിരഞ്ഞെടുക്കുമ്പോള്‍ അമിത മോഹങ്ങളുടെയും വലിയ കുടുംബത്തിന്റെ ബുദ്ധിമുട്ടുകള്‍ മാറ്റി ഒരു സാധാരണ ജീവിതം ഉറപ്പാക്കണം.  കടല്‍ കടന്നവരുടെ ആദ്യകാല വഴികള്‍ പൂക്കള്‍ നിറഞ്ഞതായിരുന്നില്ല.

പാലാ മോനിപ്പള്ളിയിലെ ഒരു സാധാരണയില്‍ സാധാരണ തടിക്കച്ചവടക്കാരന്റെ ഒമ്പത് മക്കളില്‍ രണ്ടാമനായി ജനിച്ച  ജോൺ ബേബി ഊരാളിൽ 19-ാം വയസ്സിലാണ് അമേരിക്കയില്‍ എത്തുന്നത്.     വിദ്യാര്‍ത്ഥി വിസയില്‍ അമേരിക്കയില്‍ എത്തിയ ബേബി ഊരാളില്‍ എന്ന പത്തൊമ്പത് കാരന്‍ ഇനന് ഓരോ അമേരിക്കന്‍ മലയാളിയും അറിയുന്ന ബേബി മാത്യു ഊരാളില്‍ ആയി മാറിക്കഴിഞ്ഞു.  നോര്‍ത്ത് അമേരിക്കയില്‍ ആരോഗ്യ രംഗത്തെ ഒരു ബ്രാന്റ് നെയിം ആയ ‘ചോയിസ് ക്ലിനിക്കല്‍ ലാബ്’ ശൃംഖലയുടെ ഉടമ, അമേരിക്കന്‍ മലയാളി സംഘടനകളുടെ അമ്പ്രല്ലാ ഓര്‍ഗനൈസേഷന്‍ ‘ഫോമ’ യുടെ മുന്‍ പ്രസിഡന്റ് എന്നീ നിലകളിലൊക്കെ ബേബിച്ചായന്‍ ഇന്ന് അമേരിക്കയില്‍ നിറഞ്ഞു നില്‍ക്കുന്നു.  മലയാളം ഉള്‍പ്പെടെ നിരവധി ടെലിവിഷന്‍ ചാനലുകള്‍ അമേരിക്കന്‍ മലയാളികള്‍ക്ക് എത്തിക്കുന്ന യുണൈറ്റഡ് മീഡിയയുടെ സാരഥികളില്‍ ഒരാളായ ജോൺ ബേബി ഊരാളിലുമായി ഡെയ്‌ലി റിപ്പോര്‍ട്ട്‌സിന്റെ എക്‌സിക്യൂട്ടീവ് എഡിറ്റര്‍ അരവിന്ദ് വി നടത്തിയ അഭിമുഖം.

uralil 3   വിദ്യാര്‍ത്ഥിയായാണ് അമേരിക്കയില്‍ എത്തുന്നത്  ?

അന്ന് 19 വയസ്സാണ് പ്രായം.  സഹോദരി അമേരിക്കയില്‍ നഴ്‌സാണ്.  അതുകൊണ്ടു തന്നെ പാരാമെഡിക്കല്‍ കോഴ്‌സ് തിരഞ്ഞെടുത്തു.  ലാബ് സംബന്ധമായ പഠനം.

?    അമേരിക്കയിലൊക്കെ പഠിക്കാനുള്ള സാമ്പത്തിക ബലം ഉണ്ടായിരുന്ന കുടുംബമായിരുന്നോ ?

ഒരു സാധാരണ തടിക്കച്ചവടക്കാരനാണ് അപ്പന്‍.  അമ്മ; ഒമ്പത് മക്കളുടെ അമ്മ.  രണ്ടാമത്തെ ആളാണ് ഞാന്‍.  താഴെ ഏഴു പേര്‍.  പെങ്ങള്‍ അമേരിക്കയില്‍ എത്തിയപ്പോള്‍ തന്നെ ഏതാണ്ട് മാര്‍ഗ്ഗം തെളിഞ്ഞു വന്നു.  തിരിഞ്ഞു നോക്കി ചിന്തിക്കാനൊന്നും ഉണ്ടായിരുന്നില്ല.  അപ്പന്‍ മരിച്ചു.  അമ്മയും സഹോദരങ്ങളെല്ലാം ഇപ്പോള്‍ അമേരിക്കയിലാണ്.

?     എല്ലാവരേയും ബേബിച്ചായന്‍ തന്നെയാണ് എത്തിച്ചത് ?

ഇതൊരു തുടര്‍ച്ചയാണ്.  എന്നെ ആരാ എത്തിച്ചത് ?  സഹോദരിയെ എത്തിച്ച ആള്‍ അല്ലേ  തുടക്കം? പക്ഷേ അദ്ദേഹത്തെ ആരാ എത്തിച്ചത് ? പ്രവാസം സംഭവിക്കുന്നാണ്.  ആര്‍ക്കും അതിന്റെ മേനി പറഞ്ഞ് നടക്കാനാവില്ല.  പക്ഷേ, ആ തുടര്‍ച്ചയില്‍ ഞാന്‍ വിള്ളലുണ്ടാക്കിയിട്ടില്ല.  സാധിക്കുന്നതുപോലെ ഓരോരുത്തരെയായി എത്തിച്ചു.

?     ആദ്യമെത്തുമ്പോള്‍ അമേരിക്കയിലെ അവസ്ഥ എന്തായിരുന്നു ?

നമ്മുടെ ഏഴു രൂപയ്ക്ക് ഒരു ഡോളര്‍ കിട്ടുമായിരുന്നു അന്ന്.  രൂപയ്ക്ക് അത്രയും മൂല്യമുണ്ടായിരുന്നിട്ട് കൂടി പാര്‍ട്ട് ടൈം ജോലി എടുത്തു തന്നെയാണ് പഠനം പൂര്‍ത്തിയായത്.  പിന്നെ തൊഴില്‍ സാഹചര്യം അന്നും ഇന്നും സ്വന്തം ബിസിനസ്സ് തന്നെയാണ് അമേരിക്കയില്‍ നല്ലത്.  സ്ഥിര ജോലിക്ക് ശമ്പളം മാത്രം കിട്ടും.  നാട്ടിലെ പോലെ മറ്റ് സുരക്ഷിതത്വങ്ങള്‍ ഒന്നുമില്ല.

?    അതുകൊണ്ടാണോ ബിസിനസ്സ് രംഗത്തേക്ക് കടന്നത് ?

ലക്ഷ്യം അതു തന്നെയായിരുന്നു.  പതിമൂന്ന് വര്‍ഷത്തോളം വിവിധ ലാബുകളില്‍ ജോലി ചെയ്തു കണ്ട് പഠിക്കുക എന്നായിരുന്നു ലക്ഷ്യം.  ആദ്യം പത്ത് വര്‍ഷത്തോളം ജോലി ചെയ്തിടത്ത് മാനേജ്‌മെന്റ് തന്ത്രങ്ങള്‍ പഠിക്കാന്‍ പറ്റിയില്ല.  വലിയ ലാബുകളില്‍ നിന്നാല്‍ അത് നടക്കില്ലെന്ന് തിരിച്ചറിയാന്‍ പിന്നെയും രണ്ട് സ്ഥലത്തു കൂടി ജോലി ചെയ്യേണ്ടി വന്നു.  ഒടുവില്‍ ഒരു ചെറിയ ലാബില്‍ മാനേജരായി ജോലി ചെയ്തു.  നടത്തിപ്പിന്റെ പാഠങ്ങള്‍ അവിടെ നിന്നാണ് നേടിയത്.  ആദ്യം ‘ചോയ്‌സ് ക്ലിനിക്കല്‍ ലാബ്’ എന്ന പേരില്‍ ന്യൂയോര്‍ക്കില്‍ നിന്നായിരുന്നു ആരംഭം.  ഇപ്പോള്‍ വിവിധ സ്റ്റോറുകളിലായി ആറ് ലാബുകള്‍ ഉണ്ട്.

uralil 1

   അമേരിക്കയില്‍ ഇന്ത്യാക്കാരോട് വിവേചനം ഉണ്ടോ ?

എത്തിയ കാലത്തുണ്ടായിരുന്നു. അതിന്ത്യാക്കാരോടെന്നല്ല, പൊതുവില്‍ എല്ലാവരോടും ഉണ്ടായിരുന്നു.  ഇപ്പോള്‍ പക്ഷേ ഇന്ത്യാക്കാരോടാണ് താത്പര്യം.  അതൊക്കെ ആണെങ്കിലും  ഒരേ യോഗ്യതയില്‍ രണ്ട് പേര്‍ വന്നാല്‍ ഇപ്പോഴും മുന്‍ഗണന തദ്ദേശീയനു തന്നെ.  അതെല്ലായിടത്തും അങ്ങിനെ തന്നെയല്ലേ ?  ഐ.ടി. മേഖലയിലൊക്കെ ഇന്ത്യാക്കാര്‍ക്ക് നല്ല സ്വാധീനമാണ്.  ഗൂഗിളിന്റെ സി.ഇ.ഒ. പോലും ഇന്ത്യാക്കാരന്‍ അല്ലെ.

?   ഐ.പി.ടി.വി. സാങ്കേതിക വിദ്യ ഉപയോഗിച്ചുള്ള ടെലിവിഷന്‍ രംഗത്ത് കടന്നു വന്നത് ?

മലയാളം ചാനലുകള്‍ നോര്‍ത്ത് അമേരിക്കയില്‍ വിതരണം ചെയ്യാന്‍ ഐ.പി.ടി.വി. സാങ്കേതിക വിദ്യ പ്രയോജനപ്പെടുത്തി ആദ്യം രംഗത്ത് വന്നത് ക്രിസ്റ്റഫര്‍ ജോണ്‍ ആണ്.  ബോം ടിവി ആണ് ക്രിസ്റ്റഫര്‍ ജോണ്‍ നേതൃത്വം നല്‍കിയ സ്ഥാപനം. പിന്നീട് ഞാന്‍ ചിലരുമായി സാമ്പത്തിക പങ്കാളിത്തത്തില്‍ മറ്റൊരു സംരംഭം തുടങ്ങി.  അത് മലയാളം ഐ.പി.ടി.വി.  ഒരേ കാര്യത്തിനായി രണ്ട് കമ്പനികള്‍ സമാന്തരമായി പ്രവര്‍ത്തിക്കുന്നത് ബുദ്ധിയല്ല  എന്ന് മനസ്സിലാക്കി.  ഇപ്പോള്‍ ബോം ടിവിയ്‌ക്കൊപ്പം ഞങ്ങളും ചേര്‍നന് നില്‍ക്കുകയാണ്.  ഒരു പുതിയ കമ്പനിയായി യൂണൈറ്റഡ് മീഡിയ എന്ന പേരിലാണ് ഇപ്പോള്‍ വിതരണം നടക്കുന്നത്.  ക്രിസ്റ്റഫറും ജോണ്‍ ടൈറ്റസും ഞാനും അടക്കം എല്ലാവരും ഇപ്പോള്‍ പങ്കാളികളാണതില്‍.  ഇത്രയധികം മലയാളം ചാനലുകള്‍ ഒരുമിച്ച് ഇതേ ചിലവില്‍ ലഭ്യമാകുന്ന മറ്റൊരുതരം സേവനവും നിലവിലില്ല.  അതുകൊണ്ട് തന്നെ യൂണൈറ്റഡ് മീഡിയ മലയാളിയുടെ നാവിലെ പേരായിക്കഴിഞ്ഞു.  ഇതേ ടീമിന്റെ ഉടമസ്ഥതയില്‍ ഒരു പ്രവാസി ചാനലും പ്രവര്‍ത്തിക്കുന്നുണ്ട്.

baby uralil

?    മലയാളം ഭാഷയായ മാധ്യമങ്ങളുടെ വളര്‍ച്ച ? അവയുടെ നിലനില്‍പ്പ് ?

മലയാളം അറിയാത്ത തലമുറ ഇവിടെ വളര്‍ന്നാല്‍ എല്ലാം നില്‍ക്കും.  ഇപ്പോള്‍ നല്ല രീതിയില്‍ മലയാളം മാധ്യമങ്ങള്‍ക്ക് വളര്‍ച്ചയുണ്ട്.  ഇത് പരസ്പരം വളരേണ്ടതാണ്.  മാധ്യമങ്ങളുടെ സ്വാധീനത്താല്‍ കുട്ടികള്‍ മലയാളം പഠിക്കണം.  ആ രീതിയില്‍ മാധ്യമങ്ങള്‍ പ്രവര്‍ത്തിക്കണം.  കാരണം മലയാളം അറിയാത്ത തലമുറ വന്നാല്‍ പിന്നെ ഇതൊക്കെ ആരു വായിക്കും ? കാണും ?

എന്റെ അമ്മ അമേരിക്കയില്‍ ഉള്ളതുകൊണ്ടാവണം എന്റെ മക്കളൊക്കെ നല്ലതുപോലെ മലയാളം പറയും.  മലയാളി സംഘടനകള്‍ക്കും ഇക്കാര്യത്തില്‍ വളരെയേറെ ചെയ്യാനാകും.

?    ഫോമയുടെ മുന്‍ പ്രസിഡന്റായിരുന്നല്ലോ? സംഘടനകളുടെ പ്രവര്‍ത്തനങ്ങളെക്കുറിച്ച് വിശദമായി അറിയാന്‍ ആഗ്രഹമുണ്ട് …

മലയാളി സംഘടനാ പ്രവര്‍ത്തനങ്ങളെക്കുറിച്ച് ; പതിയിരിക്കുന്ന വലിയ ഒരു അപകടത്തെക്കുറിച്ച് അടുത്ത അദ്ധ്യായത്തില്‍ തുടരും…

Comments

comments

Seo wordpress plugin by www.seowizard.org.