Breaking News

വളരുന്ന യുവതലമുറയ്ക്ക് ‘ലവ്’ എന്ന വാക്കിനെ പോലും ഭയമാണ്: റിമ കല്ലിങ്കല്‍

rima-kallingal

കൊല്ലം അഴീക്കലില്‍ നടന്ന സദാചാര ഗുണ്ടായിസത്തില്‍ മനംനൊന്ത് യുവാവ് ജീവനൊടുക്കിയെന്ന വാര്‍ത്ത അപമാനത്തോടെയും ഞെട്ടലോടെയുമാണ് കേരളം കേട്ടത്. സമൂഹ മാധ്യമങ്ങളിലും ഈ വിഷയത്തില്‍ നിരവധി ചര്‍ച്ചകള്‍ക്കും തുടക്കമിട്ടു. പക്ഷേ ഇത്തരം സാമൂഹിക വൈകൃതങ്ങള്‍ക്കെതിരെ എത്രയും പെട്ടെന്ന് സ്വീകരിക്കേണ്ട നടപടികള്‍ എന്താണ്. ഈ ചോദ്യമാണ് നടി റിമാ കല്ലിങ്കല്‍ ഉയര്‍ത്തുന്നത്.

റിമ കല്ലിങ്കലിന്റെ ഫെയ്‌സ്ബുക്ക് പോസ്റ്റ്:

‘ആലപ്പുഴയില്‍ ഷൂട്ടിങിന് പോയ സമയത്ത് എന്നില്‍ നിന്നും ഓട്ടോഗ്രാഫ് വാങ്ങുവാനായി ഒരു കുട്ടിയെത്തി. ‘ലവ് റിമ’ എന്നെഴുതി കൊടുത്തു അതില്‍. കുറച്ചു കഴിഞ്ഞപ്പോള്‍ കുട്ടി തിരിച്ചെത്തിയിട്ട് ലവ് എന്ന വാക്ക് ഒഴിവാക്കണമെന്നും അല്ലെങ്കില്‍ കൂട്ടുകാര്‍ തന്നെ കളിയാക്കുമെന്നും അവന്‍ പറഞ്ഞു. ലവ് എന്ന വാക്കിനെ പോലും ഭയപ്പെട്ടുകൊണ്ട് വളരുന്ന നമ്മുടെ യുവതലമുറയുടെ പോക്ക് എങ്ങോട്ടേക്കാണ്? റിമ ചോദിക്കുന്നു. അഴീക്കലിലും നാട്ടികരയും യൂണിവേഴ്‌സിറ്റി കോളജിലും ഫറൂഖ് കോളജിലും മഹാരാജാസ് കോളജ് പ്രിന്‍സിപ്പല്‍ പെണ്‍കുട്ടികളും ആണ്‍കുട്ടികളും ഒന്നിച്ചിരിക്കുന്നതിനെ കുറിച്ചു പറഞ്ഞ വാക്കുകളും എല്ലാം ചെന്നു നില്‍ക്കുന്നതും അത് സമൂഹത്തിനു മുന്നില്‍ സൃഷ്ടിക്കുന്നതും ആഹ്വാനം ചെയ്യുന്നതും ആണും പെണ്ണും ഒന്നിച്ചിരിക്കുന്നത് അസ്വാഭാവികമായ എന്തോ ഒന്ന് എന്നതിലേക്കാണ്. അങ്ങനെയുള്ളൊരു സാമൂഹിക മനോഭാവമാണ് സൃഷ്ടിക്കുന്നത്.

സദാചാര ഗുണ്ടകള്‍ക്കെതിരെ മുഖ്യമന്ത്രിയും ഡിജിപിയുമൊക്കെ ശക്തമായി രംഗത്തെത്തി. പക്ഷേ അഴീക്കലില്‍ വച്ച് ആ യുവതിയേയും യുവാവിനേയും സദാചാരം പറഞ്ഞ് ആക്രമിച്ചവര്‍ക്കെതിരെ ഉടനടി എന്തു നടപടിയാണ് സ്വീകരിച്ചത്. അവരൊക്കെ ശിക്ഷിക്കപ്പെട്ടാല്‍ പോലും എല്ലാത്തിനും പരിഹാരമാകുമോ? മൊബൈല്‍ ക്ലിപ്പുകള്‍ക്കായി കാത്തിരിക്കുന്ന സമൂഹത്തിലെ ഒരു വിഭാഗത്തെ ആരാണ് എങ്ങനെയാണ് തിരുത്തുക?എന്തൊക്കെ ചെയ്താലും പറഞ്ഞാലും ആ യുവാവ് പോയിരിക്കുന്നു……

Comments

comments