Breaking News

ഒരു മാധ്യമ പ്രവർത്തകൻ ‘ആന്റി സംഘി’ ആണോ എന്ന് എങ്ങനെ കണ്ടു പിടിക്കാം ?

ഇന്ത്യയിലെ ദേശീയ മാധ്യമങ്ങളൊക്കെ രാജ്യസ്നേഹത്തിന്റെയും ദേശി ഉൽപ്പന്നങ്ങളുടെയും നരേന്ദ്ര മോദിയുടെ തന്നെയും മേന്മകൾ ജനങ്ങളിലേക്ക് എത്തിക്കുന്ന പ്രവർത്തനങ്ങളിൽ സജീവമാണ്. പരമ്പരാഗത മാധ്യമപ്രവർത്തനത്തിന്റെ ശൈലിയിൽ കാതലായ മാറ്റങ്ങൾ വരുത്തി സമ്പൂർണ്ണ സമ്പന്നമായ സാഹചര്യങ്ങളൊരുക്കുന്നതിൽ നിതാന്ത ജാഗ്രതയാണ് ദേശീയ മാധ്യമങ്ങളിലെ ‘പ്രവർത്തകർ’ പുലർത്തി വരുന്നത്. ഇതിനായി ചില പ്രത്യേക സാമ്പത്തിക സഹായം മാസശമ്പളത്തിനൊപ്പം പലർക്കും ലഭിക്കുന്നു എന്ന മതിയായ അടിസ്ഥാനമില്ലാത്ത പ്രചാരണം വായുവിൽ പറക്കുന്നുമുണ്ട്. എന്തായാലും വിഷയം അതല്ല. എങ്ങനെ ‘ആന്റി സംഘി മാധ്യമ പ്രവർത്തകരെ’ കണ്ടെത്താം എന്നതാണ്.

ആന്റി സംഘി എന്നാൽ സംഘികൾക്കെതിരായ വാർത്തകൾ നൽകി വരുന്ന മാധ്യമങ്ങൾ, അവരുടെ ശമ്പളം പറ്റുന്ന ജീവനക്കാർ, അത് വായിക്കുന്ന വായനക്കാർ എന്നിങ്ങനെ പോകുന്നു. വാർത്തകൾ തയ്യാറാക്കുന്നതിൽ ആന്റി സംഘിസത്തിൽ അത്യുത്സാഹം കാണിക്കുന്ന മാധ്യമ പ്രവത്തകർക്ക് പൊതുവിൽ ചില സ്വഭാവ വൈകല്യങ്ങൾ ഉണ്ട്. അതിൽ ചിലതെങ്കിലും ഉണ്ടെങ്കിൽ അവരെ ‘ആന്റി സംഘി’ എന്ന് സ്ഥിരപ്പെടുത്താം. ചില സമീപകാല സംഭവങ്ങളെ വച്ച് തന്നെ നമുക്കീ ‘രാജ്യ ദ്രോഹികളെ ‘ കണ്ടെത്താം.

A.  കാശ്മീരിൽ ഒരു പെൺകുട്ടി മരണപ്പെട്ട സംഭവം

1. ഈ സംഭവം വർത്തയാക്കുമ്പോൾ ‘നിഷ്ടൂരം’ , ‘ദാരുണം ‘ എന്നിങ്ങനെ അനാവശ്യ പദപ്രയോഗങ്ങളാൽ അത് ജനങ്ങളിൽ ചിന്തയുണർത്തും വിധം തയ്യാറാക്കും.

2. വിദ്വേഷത്തിന്റെയും ആവേശത്തിന്റെയും ഒക്കെ പ്രതിഫലനം സംഘികൾക്ക് എതിരാക്കാൻ ശ്രമിക്കും.

3. ആ പെൺകുട്ടി മരിക്കാൻ കാരണമായേക്കാവുന്ന മറ്റു സാധ്യതകൾ ഇക്കൂട്ടർ വാർത്തയായി നൽകില്ല. ഉദാഹരണത്തിന് ; കോലാടോ കാണ്ടാമൃഗമോ പെൺകുട്ടിയെ കുത്തി കൊന്നു, അശ്രദ്ധമായി നടന്ന പെൺകുട്ടിയെ ടിപ്പർ ലോറി വന്നിടിച്ചു മുതലായ ഊഹങ്ങൾ നൽകി സംഘിയെ സഹായിക്കാൻ അവർ തയ്യാറാവില്ല.

4. വളരെ മൃദുവായി ബലാത്ക്കാരം ചെയ്ത ശേഷം വേദന അറിയാതിരിക്കാൻ തലയ്ക്ക് അടിച്ചു കൊന്ന് ആ കുട്ടിയെ രക്ഷിച്ച സംഘി സഹോദരന്മാർക്ക് അനുകൂലമായി പതാകയേന്തി ജാഥ നടത്തിയ മന്ത്രിമാരെ അതി ക്രൂരമായി അപമാനിക്കാൻ ആ ‘ആന്റി സംഘി’കൾ ശ്രമിക്കും.

5. ഇത്തരം സംഭവങ്ങൾ നടക്കുന്നത് കാശ്മീരിലല്ലേ ? കേരളത്തിലുള്ള ആളുകൾക്ക് ഇതിലെന്താ കാര്യം എന്ന വിചാരമൊന്നും ഇക്കൂട്ടർക്ക് കാണില്ല. അവർ ഭാരതം എന്റെ രാജ്യമാണ് എല്ലാവരും അവരുടെ സഹോദരിമാരാണ് എന്നൊക്കെ പുലമ്പും. ദേശീയതയും ഇന്ത്യ എന്റെ രാജ്യമാണ് എന്നൊക്കെയുള്ളതുമൊക്കെ സിനിമാ തീയറ്ററിൽ പോയി ആദ്യം എഴുന്നേറ്റു നിൽക്കുക എന്നതാണെന്ന് ഇവർക്ക് അറിയില്ല.

6. കാശ്മീരിൽ ഒരു കുഞ്ഞിനെ സംഘി സഹോദരന്മാർ ബലാത്സംഗം ചെയ്തു കൊലപ്പെടുത്തിയാൽ ഉടനെ തന്നെ കേരളത്തിൽ കൊല്ലപ്പെട്ട പെൺകുട്ടികളുടെ പേരും ചിത്രവും വച്ച് ‘ഇത് ചെയ്തപ്പോൾ നിങ്ങൾ എവിടെയായിരുന്നു ? ‘ എന്നൊക്കെയുള്ള വാചകങ്ങളുമായി വാർത്തകൾ ഉണ്ടാക്കാൻ ഈ പറയുന്ന ‘ആന്റി സംഘി’ ശ്രമിക്കില്ല.

7. അവൾ ഒരു മുസ്‌ളീം ആയതു കൊണ്ടും ആ പ്രദേശത്ത് ഹിന്ദുക്കൾ മാത്രം മതി എന്നതു കൊണ്ടും ആണ് കാശ്മീരിൽ ഒരു പിഞ്ചു കുഞ്ഞിനെ കൊന്നതെന്ന സത്യം ഇവർ ഒരു ഉളുപ്പും കൂടാതെ വിളിച്ചു പറയും.

8. ബലാത്സംഗം ചെയ്യപ്പെട്ട ഹിന്ദു പെൺകുട്ടികളുടെ പേരൊക്കെ ചുമ്മാതെ പറഞ്ഞു പോസ്റ്റ് ഉണ്ടാക്കി അത് വർത്തയാക്കാൻ ഇവർ ഒരിക്കലും തയ്യാറാവില്ല.

9. പെരുമ്പാവൂരിൽ ഹിന്ദു പെൺകുട്ടിയെ അമീറുൽ എന്ന മുസ്‌ലിം ബലാത്സംഗം ചെയ്തു കൊന്നപ്പോൾ ഞങ്ങൾ പരാതി ഒന്നും പറഞ്ഞില്ലല്ലോ എന്ന ബുദ്ധിപരമായ ചോദ്യങ്ങൾ വാർത്തകളിലൂടെ ഉന്നയിക്കാൻ ഇവർ തയ്യാറാവില്ല.

10. ഈ വിഷയത്തിൽ മൗനം പാലിക്കുന്ന മോദിജി , കുമ്മനം ജി , ഗോപാലകൃഷ്ണൻ ജി , സുരേന്ദ്രൻ ജി തുടങ്ങിയ ജികൾ ഏതേലും പാലുകാച്ചിന് പോയാലും പിന്തുടർന്ന് മൈക്കും കൊണ്ട് ചെന്ന് വായിലിട്ടു കുത്തി കുത്തി ചോദിച്ചു വേദനിപ്പിക്കുന്നവരെ ഒരു സംശയവും കൂടാതെ നമുക്ക് ‘ആന്റി സംഘി’ എന്ന് വിളിക്കാം.

B.  മഹാഭാരതകാലത്ത് ഇന്റർനെറ്റും കംപ്യൂട്ടറുമൊക്കെ ഉണ്ടെന്ന സത്യം പറഞ്ഞ ബിപ്ലവജി

1. ഇന്റർനെറ്റ് വഴിയാണ് മഹാഭാരതയുദ്ധം ലൈവ് ചെയ്തതെന്ന കണ്ടെത്തൽ നടത്തിയ സംഘ പുത്രൻ ബിപ്ലവ് ദേബ് എന്ന ശാസ്ത്രജ്ഞ ബുദ്ധിയുള്ള ത്രിപുര മുഖ്യമന്ത്രിയെ കളിയാക്കി വാർത്തകൾ ചമച്ചവർ ‘ആന്റി സംഘി’ ആണ് എന്നതിൽ തർക്കമില്ല.

2. അമേരിക്കയിലും മറ്റ് പാശ്ചാത്യ രാജ്യങ്ങളിലും ഇന്റര്‍നെറ്റ് എത്തുന്നതിനേക്കാള്‍ ആയിരക്കണക്കിന് വര്‍ഷങ്ങള്‍ക്ക് മുമ്പേ ഇന്ത്യയില്‍ ഇന്റര്‍നെറ്റ് ഉണ്ടായിരുന്നുവെന്ന് അദ്ദേഹം പറഞ്ഞതിൽ എന്താണ് തെറ്റെന്ന് ചോദിയ്ക്കാൻ ഇക്കൂട്ടർ തയ്യാറാകില്ല.

3. ”ഇന്റർനെറ്റ് ഇല്ലായിരുന്നുവെങ്കില്‍ എങ്ങനെയാണ് സഞ്ജയന് കുരുക്ഷേത്രയുദ്ധത്തെപ്പറ്റി ധൃതരാഷ്ട്രര്‍ക്ക് വിശദീകരിച്ച് നല്‍കാനാവുക?” എന്ന ബുദ്ധിപരമായ ചോദ്യം ഉന്നയിച്ച ബിപ്ലബ് ദേബിന്റെ പൂർണ്ണകായ ചിത്രം ഒന്നാം പേജിൽ നൽകാൻ ഈ പറയുന്ന ‘ആന്റി സംഘികൾ’ തയ്യാറാവില്ല.

4. ഇത്തരം അത്യാധുനിക സാങ്കേതിക വിദ്യകള്‍ നിലവിലുണ്ടായിരുന്ന രാജ്യത്ത് ജനിക്കാന്‍ സാധിച്ചതില്‍ താന്‍ അഭിമാനം കൊള്ളുന്നുവെന്ന ബിപ്ലബ് കുമാര്‍ ദേബിന്റെ വികാരോജ്വലമായ പ്രസംഗം അദ്ദേഹത്തെ അപഹസിക്കാൻ തന്നെ ഉപയോഗിച്ചുവെങ്കിൽ തർക്കമില്ല ആ മാധ്യമ പ്രവർത്തകൻ ‘ആന്റി സംഘി’ തന്നെ.

C. നോട്ട് ക്ഷാമം

1. നോട്ട് നിരോധനം എന്ന അതിബുദ്ധിപരമായ നീക്കത്തിന്റെ തുടർച്ചയായി ഇന്ത്യയിലെ മുഴുവൻ എ ടി എം ലും നോട്ട് ഇല്ലാത്ത അവസ്ഥയെ ‘ക്ഷാമം’ എന്ന് വിളിച്ചു അപമാനിച്ചു.

2. എ ടി എം ൽ നിന്നും നോട്ടുകൾ ഒഴിപ്പിച്ച് ജനത്തിന്റെ ചിലവ് നിയന്ത്രിച്ച ഭരണതന്ത്രത്തെ പരാമർശിച്ചു അതി മ്ലേശ്ചമായ വാർത്തകൾ അവതരിപ്പിച്ചാൽ അവർ സംഘി തന്നെ.

3. രാജ്യത്ത് നോട്ടുകൾ കൊണ്ട് ആളുകൾ ഓരോ ആവശ്യങ്ങൾ നടത്തുന്നതിലൂടെ അവർ ദുഷ്‌ചിലവ് നടത്തുകയും അത് വഴി പണം ചോരുകയും ചെയ്യുന്നത് തടയാൻ സർക്കാർ നടത്തിയ അതി ബുദ്ധിപരമായ നീക്കമാണിതെന്ന് തുറന്നടിക്കാൻ കഴിയാതെ പോയ എല്ലാ മാധ്യമപ്രവർത്തകരും സംഘ പരിവാറിന്റെ ബുദ്ധിയിൽ അസൂയാലുക്കളാണ്.

D.  ഇന്ധന വില വർദ്ധന

1. ഇന്ധന വില ഇടയ്ക്കിടെ ഉയർത്തുന്നത് എന്തിനാണെന്ന സത്യം ജനങ്ങളെ അറിയിക്കാൻ കഴിയാത്ത എല്ലാവരും ആന്റി സംഘികൾ തന്നെ.

2. പണ്ടൊക്കെ ഒരു ലിറ്റർ കുപ്പിയിൽ 50രൂപയുടെ പെട്രോൾ കൊള്ളുമായിരുന്നു. പക്ഷെ ഇപ്പോൾ 80 രൂപയുടെ പെട്രോൾ കൊള്ളുമെന്ന സത്യം ജനങ്ങളെ ബോധിപ്പിക്കാൻ തയ്യാറാവാതെ കേന്ദ്രത്തെ കുറ്റം പറയുന്ന മാധ്യമ പ്രവർത്തകരെ ധൈര്യമായി തന്നെ സംഘശത്രു എന്ന് വിളിക്കാവുന്നതാണ്.

3. പെട്രോൾ – കക്കൂസ് ബന്ധം പോലും തമാശയായി കാണുന്നവരൊക്കെ സംഘ വിരുദ്ധത കൊണ്ട് നടക്കുന്നവർ തന്നെ.

4. ഇനിയും കുറഞ്ഞത് 50 കോടി കക്കൂസ് എങ്കിലും പണിയാനുള്ളതിനാൽ ജനങ്ങൾ പെട്രോൾ വിലയുടെ കൂടെ അതിനുള്ള കോണ്ട്രിബൂഷൻ കൂടി നൽകി സഹായിക്കണം എന്ന് ആവശ്യപ്പെട്ട് വാർത്ത നൽകാൻ തയ്യാറാവാത്ത എല്ലാ മാധ്യമ പ്രവർത്തകരെയും ഇതിനാൽ ആന്റി സംഘി എന്ന് വിളിച്ചോളാൻ കമ്മിറ്റി കൂടി തീരുമാനിക്കുകയൊന്നും വേണ്ട.

Comments

comments