Breaking News

‘സ്ത്രീയെ പാപമായി കണ്ട പുരുഷ മേധാവിത്വം’; ശബരിമല വിഷയത്തില്‍ പ്രതികരണവുമായി എന്‍.എസ് മാധവന്‍

എല്ലാ പ്രായത്തിലുമുള്ള സ്ത്രീകള്‍ക്ക് ശബരിമലയില്‍ പ്രവേശനം അനുവദിച്ചുകൊണ്ടുള്ള ചരിത്ര വിധിക്ക് പിന്നാലെ വാദപ്രതിവാദങ്ങള്‍ മുറുകുന്നു. ആചാരാനുഷ്ഠാനങ്ങളുടെ പേരില്‍ സുപ്രീം കോടതി വിധിയെ എതിര്‍ക്കുന്നവരോട് എഴുത്തുകാരനായ എന്‍.എസ് മാധവന്‍ വസ്തുതകള്‍ അവതരിപ്പിച്ച് ചില ചോദ്യങ്ങള്‍ ചോദിച്ചിരിക്കുകയാണ്. സ്ത്രീയെ പാപമായി കണ്ട സവര്‍ണ പുരുഷ മേധാവിത്വമാണ് ശബരിമലയിലെ ആചാരാനുഷ്ഠാനങ്ങളുടെ അടിത്തറയെന്ന് അദ്ദേഹം ട്വിറ്ററിലൂടെ വിമര്‍ശിക്കുന്നു.

വളരെ പഴക്കമുള്ളതെന്ന് പറയുന്ന ശബരിമലയിലെ ആചാരങ്ങള്‍ക്ക് എത്രവര്‍ഷത്തെ പഴക്കമുണ്ടെന്നാണ് എന്‍ എസ് മാധവന്‍ ചോദിക്കുന്നത്. 1972 ല്‍ മാത്രമാണ് നിയമം മൂലം ശബരിമലയില്‍ പ്രവേശിക്കുന്നതില്‍ നിന്നും സ്ത്രീകളെ വിലക്കിയിട്ടുള്ളത്. ചില പുരുഷഭക്തന്മാര്‍ക്കുണ്ടായ എതിര്‍പ്പില്‍ നിന്നായിരുന്നു ആ വിലക്ക്. അതിനു മുമ്പ് സ്ത്രീ ഭക്തര്‍ സുഗമമായി ശബരിമലയില്‍ പോയ്‌ക്കൊണ്ടിരുന്നതാണ്. 1972 ലെ സ്ത്രീ പ്രവേശന നിരോധന ഉത്തരവ് പോലും കാര്യമായ ഫലം ചെയ്തിരുന്നില്ലെന്നും എന്‍ എസ് മാധവന്‍ പറയുന്നു. അതിനു കാരണമായി ചൂണ്ടിക്കാണിക്കുന്നത് 1986 ല്‍ ഒരു തമിഴ് സിനിമയ്ക്കു വേണ്ടി പതിനെട്ടാം പടിയില്‍ ഒരു നടി നൃത്തം ചെയ്യുന്നത് ചിത്രീകരിച്ചിട്ടുണ്ടെന്നതാണ്. ഷൂട്ടിംഗിന്റെ ഫീസ് ആയി 7,500 രൂപ ദേവസ്വം ബോര്‍ഡ് വാങ്ങിയിട്ടുമുണ്ട്. 1990 ല്‍ ആണ് കേരള ഹൈക്കോടതി 10-50 നും ഇടയില്‍ പ്രായമുള്ള സ്ത്രീകള്‍ക്ക് ശബരിമലയില്‍ പൂര്‍ണമായ വിലക്ക് ഏര്‍പ്പെടുത്തി വിധി നടത്തുന്നതെന്നും എന്‍ എസ് മാധവന്‍ ചൂണ്ടിക്കാണിക്കുന്നു.

ചില പ്രത്യേക കാര്യങ്ങളില്‍ ആചാരം ഒരു വിഷയമല്ലാതായി മാറിയിട്ടുണ്ടെന്നും എന്‍ എസ് മാധവന്‍. ഇപ്പോള്‍ ക്ഷേത്രവുമായി ബന്ധപ്പെട്ട എല്ലാ തീരുമാനങ്ങളുടെയും അവസാന വാക്ക് ഒരു ബ്രാഹ്മണ കുടുംബമായിരുന്നു. ഇതുപോലെ തന്നെ ശബരിമലയുമായി ബന്ധപ്പെട്ട് മറ്റൊരു കുടുംബവും ഉണ്ടായിരുന്നു. താഴ്ന്ന ജാതിയില്‍പ്പെട്ട ഒരു ഈഴവ കുടുംബം. അയ്യപ്പനെ ആയോധന കല പഠിപ്പിച്ചത് ഈ കുടുംബക്കാര്‍ ആണെന്നാണ് പറയുന്നത്. ഈ കുടുംബത്തിനായിരുന്നു ശബരിമലയിലെ വെടിവഴിപാടിന്റെ കുത്തക. എന്നാല്‍ തിരുവിതാംകൂര്‍ ദേവസ്വം ബോര്‍ഡ് ഈ അവകാശം ബലമായി പിടിച്ചുവാങ്ങി ലേല സമ്പ്രദായത്തിലാക്കി. ശബരിമലയില്‍ ലിംഗപരമായ വിവേചനം മാത്രമല്ല, സവര്‍ണാധിപത്യമുണ്ടെന്നും എന്‍ എസ് മാധവന്‍ കുറ്റപ്പെടുത്തുന്നു.

Comments

comments