Breaking News

‘പിറവം പള്ളി വിധി നടപ്പിലാക്കാത്ത പിണറായി വിജയന്‍ ശബരിമല വിധിയില്‍ ഇത്ര തിടുക്കം കാണിക്കുന്നത് എന്തുകൊണ്ട്?’; വാസ്തവം ഇതാണ്

പിറവം പള്ളിയുമായി ബന്ധപ്പെട്ടുള്ള സുപ്രീം കോടതി വിധി നടപ്പിലാക്കാത്ത പിണറായി വിജയന്‍ എന്ന മുഖ്യമന്ത്രി ശബരിമല വിധിയില്‍ ഇത്രയും തിടുക്കം കാണിക്കുന്നത് എന്തുകൊണ്ട് എന്ന് ചോദിക്കുന്നത് സംഘികളും സംഘപരിവാറിന് കുട പിടിച്ചു നല്‍കുന്ന മറ്റ് പാര്‍ട്ടികളും സംഘടനകളുമാണ്. അവര്‍ക്ക് പിറവം പള്ളി വിധിയെ കുറിച്ച് വ്യക്തമായി അറിയാം എന്നിട്ടും അവര്‍ അറിഞ്ഞില്ലെന്ന് നടിക്കുന്നു. ശബരിമല വിധി വേഗത്തില്‍ നടപ്പിലാക്കുന്നതിലൂടെ പിണറായി വിജയന്‍ ഹിന്ദുക്കളെ വേട്ടയാടുന്ന എന്ന തരത്തില്‍ അക്കൂട്ടര്‍ കാര്യങ്ങള്‍ പറഞ്ഞുപരത്തുകയാണ്. കേരളത്തില്‍ വര്‍ഗീയതയുടെ വിഷവിത്ത് പാകി നേട്ടം കൊയ്യുക എന്നതിലുപരി മറ്റൊരു ലക്ഷ്യവും അവര്‍ക്കില്ല. നിയമങ്ങളെ കുറിച്ചും കോടതി വിധിയെ കുറിച്ചും പരിണിതപ്രജ്ഞരായ ചിലര്‍ പോലും പിറവം പള്ളി വിധിയെയും ശബരിമല വിധിയെയും ഒരേ ചരടില്‍ കെട്ടിയിട്ടാണ് പിണറായി വിജയനെതിരെ രംഗത്തുവന്നിരിക്കുന്നത്. എന്നാല്‍, കോടതി വിധികളെ കുറിച്ച് വേണ്ടത്ര ഗ്രാഹ്യമില്ലാത്ത സാധാരണക്കാരായ ജനങ്ങള്‍ സംഘികളുടെ വ്യാജ പ്രചരണങ്ങള്‍ക്ക് മുന്നില്‍ വീണുപോയിരിക്കുന്നു. അത്തരക്കാര്‍ ചുവടെ നല്‍കിയിരിക്കുന്ന ഫേസ്ബുക്ക് പോസ്റ്റ് നിര്‍ബന്ധമായും വായിക്കുക. പിറവം പള്ളിയുമായി ബന്ധപ്പെട്ട വിധിയും ശബരിമലയുമായി ബന്ധപ്പെട്ട പരമോന്നത കോടതിയുടെ വിധിയും തമ്മിലുള്ള വ്യത്യാസം ഇവിടെ ചേര്‍ക്കുന്നു. ബിസിനസ് അനലിസ്റ്റായ ജോസ് ജോസഫ് കൊച്ചുപറമ്പിലിന്റെ ഫേസ്ബുക്ക് പോസ്റ്റാണ് ഇക്കാര്യങ്ങളെ കുറിച്ച് വ്യക്തമാക്കുന്നത്. ശബരിമലയുമായി ബന്ധപ്പെട്ട വിധി ഭരണഘടനാ ബഞ്ചിന്റെ വിധിയാണെന്നതും പിറവം പള്ളിയുമായി ബന്ധപ്പെട്ട വിധി വെറും സിവില്‍ കേസിന്മേലുള്ള വിധിയാണെന്നും സാധാരണക്കാരായ ജനങ്ങളെങ്കിലും അറിഞ്ഞിരിക്കണം. ഈ രണ്ട് വിധികളിലും സര്‍ക്കാറിനുള്ള റോള്‍ എന്താണെന്നും ഇവിടെ വ്യക്തമാക്കുന്നു. ഫേസ്ബുക്ക് പോസ്റ്റിന്റെ പൂര്‍ണ്ണരൂപം:

” പിണറായി വിജയനെന്താ പിറവം പള്ളി വിധി നടപ്പാക്കാത്തത്? ക്രിസ്ത്യാനികളെ പേടിയായിട്ടല്ലേ?”

കഴിഞ്ഞ 7-8 ദിവസമായി കണ്ടുതുടങ്ങിയ ഒരു ചോദ്യമാണ്. ഒറ്റനോട്ടത്തിൽ നല്ല ചോദ്യവുമാണ് – നടപ്പാക്കാത്ത ഒരു സുപ്രീം കോടതി വിധി, അതും ഒരു പള്ളി വിഷയം : സംഘിസ്ഥാൻ റ്റീംസിൻ്റെ ഉദ്ദേശങ്ങൾ പലതും നടക്കും.

ഈ ചോദ്യം എന്നോട് നേരിട്ട് ചോദിച്ച മൂന്ന് പേരോട് ഞാൻ ഉടൻ തിരിച്ച് ചോദിച്ചത് “എന്താണ് പിറവം പള്ളി വിധി?” എന്നാണ്.

അതിശയോക്തി പറയുവല്ല, ചർച്ച അവിടെത്തീർന്നു. കാരണം, അവർക്കാർക്കും അത് എന്താണെന്ന് പോലും അറിയില്ലായിരുന്നു.

പക്ഷേ എൻ്റെ പിടിവിട്ടുപോയത് ഇന്നലെ എതോ ഒരു വാർത്താചാനലിൻ്റെ ഫേസ്ബുക്ക് പേജിൽ ഒരു കമൻ്റ് കണ്ടപ്പോഴാണ് :

” പിറവം പള്ളി പൊളിക്കാനുള്ള വിധി പിണറായി എന്താ നടപ്പാക്കത്തത് ?” എന്ന് !!

കാര്യത്തിലേയ്ക്ക് വരാം :

1. എന്താണ് പിറവം പള്ളി വിധി?

മലങ്കരക്കേസ്, ഓർത്തഡോക്സ്-യാക്കോബായ തർക്കം എന്നൊക്കെ പേരിലുള്ള ഒരു കേസുകെട്ട് കേരളസമൂഹത്തിനു മുന്നിൽ കുറേ വർഷങ്ങളായി നടക്കുന്നുണ്ട്. സത്യം പറഞ്ഞാൽ മൊത്തം മലയാളികളിൽ ഒരു ചെറിയ വിഭാഗത്തെ മാത്രം ബാധിക്കുന്ന ഒരു വിഷയമാണെങ്കിലും, ന്യായമായ ഒരു ക്രമസമാധാനപ്രശ്നം ഉണ്ടാക്കാനുള്ള മരുന്നൊക്കെ അതിലുണ്ട്. ഒരേ ചരിത്രവും പാരമ്പര്യവുമുള്ള, ഇടക്കാലത്ത് പല കാരണങ്ങളാൽ രണ്ടായി പിരിഞ്ഞ ഈ വിഭാഗങ്ങളിൽ ആരാണു ‘ശരിക്കും മുതലാളി’ എന്നതാണു തർക്കം. വിശദവിവരങ്ങളടങ്ങിയ ഒരു പോസ്റ്റിൻ്റെ ലിങ്ക് കമൻ്റിൽ കൊടുത്തിട്ടുണ്ട്.

എന്തായാലും, നൂറ് വർഷത്തോളം നീണ്ട കേസുകളികൾക്കൊടുവിൽ ഓർത്തഡോക്സ് പക്ഷമാണു യഥാർത്ഥ മലങ്കരവിഭാഗം എന്നാണ് സുപ്രീം കോടതി വിധിച്ചത്. അതിൻപ്രകാരം ആ പക്ഷത്തിൻ്റെ പ്രതിനിധിസഭയേയും , കാതോലിക്കാ ബാവായെ മലങ്കരസഭയുടെ അധിപനായും കോടതി അംഗീകരിച്ചു. 1934ൽ രൂപീകൃതമായ അവരുടെ ഭരണഘടനയനുസരിച്ച് പള്ളികൾ ഭരിക്കപ്പെടണമെന്നും പറഞ്ഞു.

ഓരോ പള്ളി തിരിച്ചും സമാനമായ കേസുകൾ നടന്നെങ്കിലും, പള്ളികളും 1934ലെ ഭരണഘടനയനുസരിച്ചോളാൻ കോടതി പറഞ്ഞു. അത് പിറവം പള്ളിക്കും ബാധകമായി.

2. എന്താണവിടുത്തെ പ്രശ്നം?

പിറവം വലിയപള്ളി എന്നത് യാക്കോബായസഭക്കാരുടെ ഒരു തലപ്പള്ളിയാണ്. ആ ഇടവകയിലെ അംഗങ്ങളിൽ ബഹുഭൂരിപക്ഷം യാക്കോബായസഭയുടെ പരമാദ്ധ്യക്ഷനായ പാത്രിയാർക്കീസിനെയും ആ പക്ഷത്തെ മെത്രാന്മാരെയും അംഗീകരിക്കുന്നു; ഓർത്തഡോക്സ് സഭാദ്ധ്യക്ഷനെ അംഗീകരിക്കുന്നില്ല. അതുകൊണ്ട് ഈ വിധി അവർക്ക് സ്വീകാര്യമല്ല.

3. അപ്പോ അവരെ ഇറക്കണോ?

പള്ളിയിൽ നിന്നും ആരെയും ഇറക്കലോ പുറത്താക്കലോ ഒന്നും വിധിയുടെ ഭാഗമല്ല. പള്ളിയും പള്ളിഭരണവും ഇപ്പോഴുള്ള ഇടവകക്കാർക്ക് തന്നെ നടത്താം. പക്ഷേ പള്ളിയുടെ വികാരിയായി ഒരു വൈദികനെ നിയമിക്കാനുള്ള അധികാരം നിയമപരമായി ഇപ്പോൾ ഓർത്തഡോക്സ് സഭയ്ക്കാണ്. ഒന്നൂടി പരത്തിപ്പറഞ്ഞാൽ , ആ പള്ളിയുടെ വികാരി, അയാൾക്ക് മുകളിലുള്ള മെത്രാൻ, അതിനും മുകളിലുള്ള മെത്രാപ്പോലീത്താ എന്നിവർ ഇപ്പോൾ ഓർത്തഡോക്സുകാരായി നിൽക്കുന്നവരാകും. അത് ഇടവകാംഗങ്ങൾ സമ്മതിക്കുന്നില്ല. ഇത് പിറവം പള്ളീൽ മാത്രമല്ല, തർക്കമുള്ള എല്ലാ പള്ളിയിലും പ്രശ്നം ഇത് തന്നെ.

4. അപ്പോ പള്ളി പൊളിക്കാൻ വിധിയിലില്ല?

ഇല്ലാന്ന് !!

5. പിന്നെയെന്താ പിണറായി ഇത് ചെയ്യാത്തേ?

ഈ കേസിൽ കേരളസർക്കാർ ഒരു കക്ഷിയോ സാക്ഷിയോ ഇടപെടൽ കക്ഷിയോ ഒന്നുമല്ല. രണ്ട് സാമുദായിക വിഭാഗങ്ങൾ തമ്മിലുള്ള സിവിൽ കേസിൽ സർക്കാരിന് ഒരു റോളുമില്ല.

പക്ഷേ വിധി നടപ്പാക്കാൻ കേസ് ജയിച്ചവർക്ക് സ്വയം കഴിയാതെ വരുമ്പോൾ അവർക്ക് സർക്കാർ സഹായം ആവശ്യപ്പെടാം. ആ സഹായം സർക്കാർ നൽകുന്നില്ലയെങ്കിൽ അവർക്ക് സർക്കാരിനെതിരായി കോടതിയലക്ഷ്യം ഫയൽ ചെയ്യാം. പിറവം പള്ളിയുടെ കാര്യത്തിൽ വിധി വന്ന് വളരെ നാളുകൾ ആയിക്കഴിഞ്ഞിട്ടും, അങ്ങനെയൊരു ഹർജി സുപ്രീം കോടതിയിലേയ്ക്ക് പോയത് ഈ കഴിഞ്ഞ ദിവസം , ശബരിമല വിഷയുമായി ബന്ധപ്പെട്ട് ഈ കേസ് ചർച്ചയായപ്പോഴാണ്. ഇതുവരെ അങ്ങനെയൊരു ഹർജി പോകാതിരുന്നത് എന്ത് എന്നാലോചിച്ചു നോക്കൂ. വിധി നടപ്പാക്കണമെന്ന് ആദ്യം ആവശ്യപ്പെട്ടപ്പോൾ ഒരു സമവായ മാർഗ്ഗമൊക്കെ സർക്കാർ നോക്കിയത് ശരിയാണ്. ഇത് ഒന്നോ രണ്ടോ പള്ളിയിൽ ഒതുങ്ങുന്ന വിഷയമല്ല, കേസുകൾ പലതും നടക്കുമ്പോഴും സമാന്തരമായി സമവായചർച്ചകളും നടക്കുന്നുണ്ട്.

ഇനിയിപ്പോ എന്തായാലും കോടതി നിർദ്ദേശം ഉടൻ വരും. സ്വാഭാവികമായും വിധി നടപ്പാക്കൽ സർക്കാരിൻ്റെ ചുമതലായി മാറും

6. എന്നാൽ അത് പോലെ ഇവിടെയും അനങ്ങാതെ ഇരുന്നാപ്പോരേ?

ഇവിടെ അത് കഴിയില്ല. കാരണം, മൗലികാവകാശം വിഷയമായ ഒരു റിട്ട് ഹർജിയിൽ വിധിയുണ്ടായാൽ സർക്കാരിനാണു പ്രാഥമിക ഉത്തരവാദിത്തം. ഹർജിക്കാരൻ്റെ മൗലികാശകാശം സംരക്ഷിക്കാൻ തത്ക്കാലം കഴിയില്ല എന്നൊക്കെ കോടതിയിൽ പോയി പറഞ്ഞാൽ ചിലപ്പോ പിറ്റേന്ന് രാജിവെക്കേണ്ടിവരും.

ചുരുക്കിപ്പറഞ്ഞാൽ – താരതമ്യം ചെയ്യാനേ കഴിയാത്ത രണ്ട് വിധികളാണ് ഇവ.

ഇനി ഒരു തമാശ പറയാം:

ശബരിമല വിഷയത്തിൽ സമരത്തിനിറങ്ങിയ ദിവസം മുതൽ യാക്കോബായ സഭക്കാർ അതിനു കട്ട സപ്പോർട്ടായിരുന്നു. നാമജപയാത്രകൾക്ക് പലയിടത്തും സ്വീകരണം നൽകി എന്ന് മാത്രമല്ല, പൊതുയോഗങ്ങളിൽ മെത്രാന്മാർ സംബന്ധിക്കുകയും ചെയ്തു. ‘വിശ്വാസത്തിൽ സുപ്രീം കോടതി ഇടപെടരുത്’ എന്ന വാദം അവർക്കും ആകർഷകമായിരുന്നു.

പക്ഷേ ഇപ്പോൾ സംഘികളെല്ലാം പിറവം പള്ളി വിധി നടപ്പാക്കണം എന്ന ലൈനിലാണ്. അതായത് യാക്കോബയക്കാർക്കിട്ട് പണി കിട്ടിയെന്ന്.

അത് ഒരു ചതിയായിപ്പോയി കേട്ടോ.  

Comments

comments