Breaking News

ഹര്‍ത്താലിനെ ചൊല്ലി ബിജെപിയില്‍ ഭിന്നത; ശ്രീധരന്‍പിള്ളയ്ക്ക് രൂക്ഷ വിമര്‍ശനം

ശബരിമല വിഷയവുമായി ബന്ധപ്പെട്ട് സംസ്ഥാനത്ത് നടത്തിയ ഹര്‍ത്താലുകളില്‍ ബിജെപിക്കുള്ളില്‍ തന്നെ ഭിന്നസ്വരം. ഹര്‍ത്താല്‍ ജനവികാരം എതിരാക്കി എന്നാണ് ഭൂരിപക്ഷം നേതാക്കളും അഭിപ്രായപ്പെടുന്നത്. കഴിഞ്ഞ ദിവസം ചേര്‍ന്ന കോര്‍ കമ്മിറ്റി യോഗത്തില്‍ ബിജെപി സംസ്ഥാന അധ്യക്ഷന്‍ പി.എസ് ശ്രീധരന്‍പിള്ളക്കെതിരെ രൂക്ഷ വിമര്‍ശനമാണ് പാര്‍ട്ടി നേതാക്കള്‍ നടത്തിയത്.

വേണുഗോപാലന്‍ നായര്‍ സെക്രട്ടറിയേറ്റിലെ ബിജെപി സമരപന്തലിന് മുന്നില്‍ ആത്മഹത്യ ചെയ്തതിനു പിന്നാലെ സംസ്ഥാനത്ത് പാര്‍ട്ടി ആഹ്വാനം ചെയ്ത ഹര്‍ത്താല്‍ ജനവികാരം പൂര്‍ണമായും എതിരാക്കി എന്ന അഭിപ്രായമാണ് കോര്‍ കമ്മിറ്റിയില്‍ ഉയര്‍ന്നത്. അപ്രതീക്ഷിതമായി പ്രഖ്യാപിച്ച ഹര്‍ത്താലുകൊണ്ട് പാര്‍ട്ടിക്ക് ഒരു നേട്ടവും ഉണ്ടായിട്ടില്ലെന്നാണ് യോഗത്തില്‍ വിലയിരുത്തല്‍. കെ. സുരേന്ദ്രന്‍ ഹര്‍ത്താലിനെ പൂര്‍ണമായും എതിര്‍ത്ത് രംഗത്തെത്തിയതോടെ ബിജെപിക്കുള്ളിലെ ഗ്രൂപ്പ് തര്‍ക്കം മറനീക്കി പുറത്തുവന്നു.

എന്നാല്‍ വേണുഗോപാലന്‍ നായരുടെ ആത്മഹത്യ അസാധാരണ സംഭവമാണെന്ന് ശ്രീധരന്‍പിള്ള പറഞ്ഞു.അത് കൊണ്ട് ഹര്‍ത്താല്‍ ഒഴിവാക്കാന്‍ കഴിയില്ലെന്നായിരുന്നു ശ്രീധരന്‍ പിള്ളയുടെ പക്ഷം.

കോര്‍കമ്മിറ്റിയോഗത്തിലും അതിനു ശേഷം നടന്ന ഭാരവാഹി യോഗത്തിലുമാണ് നേതൃത്വത്തിനെതിരെ വിമര്‍ശനം ഉയര്‍ന്നത്. കോര്‍കമ്മിറ്റി യോഗത്തില്‍ എം.ടി രമേശ് മാത്രമാണ് ഹര്‍ത്താലിനെ പിന്തുണച്ചത്.

വേണുഗോപാലന്‍ നായരുടെ ആത്മഹത്യയില്‍ ബി.ജെ.പി നടത്തിയ ഹര്‍ത്താലില്‍ പാര്‍ട്ടിക്കുള്ളില്‍ തന്നെ പ്രതിഷേധമുയര്‍ന്നിരുന്നു. കാര്യമായ കൂടിയാലോചന നടത്താതെ ചിലര്‍ സ്വന്തംനിലക്ക് ഹര്‍ത്താല്‍ പ്രഖ്യാപിച്ചെന്ന വികാരമാണ് പാര്‍ട്ടിക്കുള്ളിലുള്ളതെന്ന് നേരത്തെ റിപ്പോര്‍ട്ടുകള്‍ പുറത്ത് വന്നിരുന്നു.

സംസ്ഥാനത്തുണ്ടായിരുന്ന കോര്‍ കമ്മിറ്റി അംഗങ്ങളുമായിപോലും ആലോചിക്കാതെ നേതൃത്വത്തിലെ ഒരു സംഘം ഏകപക്ഷീയമായാണ് ഹര്‍ത്താല്‍ പ്രഖ്യാപിച്ചതെന്ന് വി.മുരളീധര പക്ഷം കേന്ദ്രനേതൃത്വത്തെ ധരിപ്പിച്ചിച്ചുവെന്നായിരുന്നു് റിപ്പോര്‍ട്ട്. കെ സുരേന്ദ്രന്‍ ഉള്‍പ്പെടെയുള്ളവരും ഹര്‍ത്താല്‍ തീരുമാനത്തിനെതിരെ രംഗത്ത് വന്നു.

ഹര്‍ത്താല്‍ കാര്യം ശ്രീധരന്‍പിള്ളയെ വിളിച്ചന്വേഷിക്ക് എന്ന് സുരേന്ദ്രന്‍ ഫോണില്‍ മറുപടിയായി പറയുന്നത് സാമൂഹ്യമാധ്യമങ്ങളില്‍ വൈറലായിരുന്നു.

Comments

comments